ካልእ ሓደራ ዝብለኩም ነግር እንተልዩ ኣብዚ ፅንኩር ግዜ ኣብ ቀረባ ይኩን ርሑቕ ኣብ ዘለና ሃልና ብዝከኣል መጠን ንደዋወል ንጠያየቅ ከመይ ኣለና ንበሃሃል።
ሰብ እናሞ ምናልባት ብዝረብሕን ብዘይረብሕን ዝተቀያየምና ሰባት እንተሃልና እግዝኣብሔር ናይ ሕይወት ትርጉም ክንርዳእ ዕድል ዝሃበና ግዜ ስለዝመስል ሓደራ ናብ ልብና ተመልስና ይቅረ ንበሃሃል።

ከምቲ ሐዚ ኣብ ፅንኩር እዋን ንበዓልትናን ንሕዝብናን ካብዙ ሕማም ንምክልካል ብሓደ ጠጠው እልና ዘለና ንቀፃላይውን ምንም እኳ ናይ ሓሳብ ኣፈላላይ እንተሃለወና ንሱ ኣብ ጎኒ ገድፍና ንናይ ሓባርን ናይ ሕዝብናን ረብሓ ኩሉ ግዜ እድ ንእድ ተተሓሕዝና ብሓደ ጠጠው ክንብል ደጊም ሓደራ እብል።

ኣብ መወዳእታ ብዛዕባ እቲ ብዙሕ ሓገዝ ዝገበርኩሙሉ ቤት ትምህርቲ ልደታ ማሪያም ዓሊተና ቁሩብ ንሓበሬታ ዝኣክል እቲ ከይዲ ስራሕ ይኩን ዕዳጋ ንብረት ብጣዕሚ ፅቡቕ ይኸይድ ኣሎ።

ዳርጋ እቲ ዝተሓስበ ስራሕ ይኩን ዝግዛእ ንብረት ተወድኡ ኣብ መወዳእታ ንላቦራቶሪ ዘድልዩ ኣቅሑትን ከሚካላትን ክግዝኡ ትልሚ ምስተትሓዘ እዚ ኩነታት ገጢሙ።
ሐዚ ምሉእ ሓሳብናን ተግባርናን ካብዚ ሕማም ምክልካልን ምድሓንን ስለዝኾንበር ምሉእ ፀብፃብ ናይ ስራሕ ቤት ትምህርቲ ኣብ ቀፃላይ ሪፖርት ክገብረልኩም እየ።

ብዝተረፈ ሎሚ ዓመት ምንም እኳ ሕማማትን በዓል ትንሳኤ ክርስቶስ መድሓንናን ከም ካልእ ግዜ ተኣኻኽብና እናተማህለልናን እናዘመርናን ክነብዕሎ እንተዘይከኣልና ንሱ ጭንቅናን መከራናን ይርእዮ ኣሎሞ ኩነታት ብዘፍቅደልና መልክዕ ናብኡ ቀርብና ምሕረቱ ንለምን።

እቶም ግዳይ ናይዙ ሕማም ኮይኖም ብሞት ዝተፈለዩና ኣሓትናን ኣሕዋትናን እግዝኣብሔር ኣምላክና ተካፈልቲ ብርሃን ትንሳኤ ክርስቶስ ይግበሮም። እቶም ብሕማም ዝሳቀዩ ዘለዉ ብዓይኒ ምሕረቱ ይጠምቶም። ካብዚ ሕማም ስብ ከድሕኑ ሕይወቶም ከይተረፈ ኣብ ሓደጋ ኣእትዮም ለይትን መዓልቲን ዝረባረቡ ዘለዉ ሓካይምን ከምኡውን ብተፈላለየ መንግዲታት ብገንዘብ ይኩን ብንዋያት ዝሕግዙ ዘለዉ ሰባት እግዚኣብሔር ባዕሉ ሓላውኦም ይኹን በረከቱን ፀጋኡን ከዓ የብዛሓሎም።

ንኣና ከዓ እቱ ብትንሳኤኡ ናይ ሞት ፅልማት ኣሸንፉ ናብ ብርሃን ዝሓለፈ ክርስቶስ ጎይታና ተካፈልቲ ብርሃነ ትንሳኤኡ ይግበረና፣ ካብዚ ወሪዱ ዘሎ መዓት ሓልዩ ከዓ ከም ቀደምና ንቡር ሕወትና እንመርሓሉ ግዜ የርእየና።

ሓውኩም ኣባ ተስፋይ ዝግታ

(Source: Tesfay Zigta Facebook)