ናይ እንቋዕ ኣብፅሓኩም መልእኽቲ ናይ አዎ ቅዱስ ሚካኤል መበል 100 ዓመት
ብብፁእ ኣቦና +አባ ተ/ሥላሴ መድኅን
ካቶሊካዊ ጳጳስ ዘመንበረ ዓዲግራት

12 ጥቅምቲ 2016 ዓ.ም.

“ኣብ ደጌታቱ ብምስጋና፣ ኣብ ኣጸዱውን ብውዳሴ እተዉ፣ ኣመስግንዎ ንስሙ ኸኣ ባርኹ። እግዚኣብሄር ሠናይ እዩ እሞ፣ ጸጋኡ ንዘለኣለም፣ እምነቱ ኸኣ ንውሉድ ወለዶ ይነብር።” (መዝ.100፡5)

ፍቁራንን ክቡራንን ሕዝበ-እግዚኣብሔር ካህናት፡ ደናግል፡ ምእመናን፡ ብሓባር፤

ሎሚ 12 ጥቅምቲ፡ 2016 ዓ.ም.፡ ኣብ’ዛ ካብ’ተን ናይ ሰበኻና ቀዳሞትን ዓበይትን ቁምስናታት ሓንቲ ዝኾነት፡ ቁምስና ቅዱስ ሚካኤል ኣዎ፡ ብልማድ “መካይል-ባራካቶ” / “ሚካኤል በረከቶ” እናተብሃለ ዝፍለጥ ቁምስናና፡ ናይ መበል 100 ዓመት ኢዮቤል (“ሓደ ዘመን”) መኽፈቲ በዓል እነኽብረሉ ዘሎና ናይ ፀጋ መዓልቲ ኢዩ፡፡ እግዚኣብሔር ኣምላኽና ብሕይወት ሓልዩ፡ ኣብ ዘዘሎናዮ ኰይንና በረከት ናይ’ዙ በዓል’ዙይ ንምስታፍ ዘብጸሐናን ዘብቀዐናን፡ ልዑል ምስጋና ይብጻሓዮ፡ እንቋዕ ኣብጸሐና/ኩም፡፡

ኣብ ውሽጢ’ዘን ሚእቲ ዓመታት እተቐበልናዮም ፀጋታት-ኣምላኽ ብዙሓት ስለዝኾና፡ ንድኅሪት ምልስ ኢልና እንሓስበሉን ንኣምላኽና እነመስግነሉን ናይ ፀጋ መዓልትን ጊዜን ኢዩ፡፡ ስለ’ዙይ ንኣምላኽናን፡ ሓላዊና-መልኣኽ ዝኾነ፡ ኩስሚ መፀወዒኣ ቅዱስ ሚካኤል ሊቀ መላእኽትን፡ ዓቢይ ምስጋና ክንምልስን ክንገልጽን መንፈሳዊ ኣገባብና ኢዩ፡፡

ታሕጓስን ምስጋና ብዝተመልኦ መንፈስን ገይርና፡ ንቶም ኣብዛ ቁምስና’ዚኣ ካብ እትምሥረት ክሳብ ሎሚ ዘገልገሉን ኣብ ምግልጋል ዝርከቡን ኵሎም ካህናት፡ ዓሚቕ ምስጋናና ይብጻሓዮም፡፡ ን’ዙ ዓቢይ ናይ መንፈሳዊ ዓወት በዓል እንክነኽብር፡ ንቶም ንካህናቶም የማናይ ኢዶም ዝነበሩ፡ ሕይወቶም ንእግዚኣብሔርን ንቁምስናኦምን ኣብ ምግልጋል ውፉያት ሓገዝቶም ንዝነበሩ መንፈሳውያን ኣቦታትን ኣዴታትን፡ ከምኡ’ውን ብመንፈስን ብኣብነት-መንፈሳውያን ወለዶም እተሃነፁ መንእሰያትን፡ ን’ዛ ቁምስና ብዝገበርዎን ዘበርከትዎን፡ ኣብ ምብርካት ዝርከቡን ኵሎም፡ ብዓቢይ ፍቕርናን ምስጋናናን ንዝክሮም፡፡

ብትብዓትን መንፈሳዊ ቅንኣትን ተለዓዒሎም ኣብ ናይ ቤተክርስቲያኖም ሕይወት እናተሳተፉ ብዝገበርዎ መንፈሳውን ማሕበራውን ትምህርታውን ጻዕርታት፡ ብዙሕ ፍረ ኣፍሪዮም ኢዮም፡፡ እዙ ፍረ’ዙይ ከዓ ካብ’ዙ ማሕበረሰብ ብዝወፁ ዝሓለፉን ብሕይወት ኣብ ናይ ፀሎትን ሓዋርያዊ ኣገልግሎት ቤተክርስቲያንን ናይ ዝርከቡ ካህናትን ደናግልን ቁጽሪ ባዕሉ ምስክር ኢዩ፡፡ እዚኦም ካብ ናይ ግሎም ናይ ኣነነት መንፈስ ወፂኦም፡ ናይ እግዚኣብሔር ፀዋዕታ ብምምላሶም፡ ልዑል ምስጋናን ኣክብሮትን ይግብኦም፡፡

ብ’ዙ ምክንያት’ዙይ’ውን፡ ን’ቱ ሓላዪ-ኵሉ ዝኾነ ኣምላኽና፡ ኣብ ዝሓለፈ ንዝገበረልና ኵሉ ክነመስግኖ፡ ንሀዝን ንቅድሚትን ንዘድልየና ኵሉ ኸዓ፡ ብእምነትን ብፀሎትን ክንልምኖ ይግባእ፡፡ ምኽሪ ቅዱስ ጳውሎስ ናብ ፊልስዩስ ብምኽታል፡
“ድሌትኩም ዘበለስ ብፀሎትን ልማኖን፡ ምስ ምስጋና፡ ኣብ ኣምላኽ ይፈለጥ እምበር፥ ብገለ እኳ ኣይትጨነቑ። …… ሰላም-ኣምላኽ ድማ ንልብኹምን ሓሳብኩምን ብክርስቶስ ኢየሱስ ገይሩ ኪሕልዎ እዩ” (ፊልጵስዩስ 4፡6-7)

ይኹን እምበር ቤተክርስቲያንና፡ ኣብ ዝሓለፋ 100 ዓመታት፡ ብፍላይ ከዓ ኣብ ኣሰቃቒ ናይ ኵናት ዓመታት፡ ዘሕለፈቶ/ዘሕለፍናዮ ፈተናታት ዝርሳዕ ኣይኮነን፡፡ ተበራቲዕና ክንወጽእን ክንራኸብን፡ ናብ’ዙ ሓድነትን ናብ’ዙ ሰዓትን ክንበፅሕ ዝበቓዕና፡ ብናይ እግዚኣብሔር ሕያውነትን ብናይ ማሕበረሰብና ፅንዓትን፡ ናይ መንእሰያትና ጅግንነትን ንናይ ሕይወት ክቡር ዕላማ ብዝገበርዎ መሥዋእትነትን ኢዩ፡፡ ስለዙይ፡ ን’ዞም ዋሕስ ሕይወትና ኰይኖም ንዝተሠውኡ ኣሓትናን ኣሕዋትናን መንግሥተ ሰማይ የዋርሰልና፡ ንዘለኣለም ከዓ ብክብሪ ንዝክሮም፤ ንኵልና ኣብ ሓዘን ንንርከብ ዘጸናንዕ ጸጋ-ኣምላኽ ይሃበና፣ ን’ቶም ንሳቶም ዝጥውርዎምን ዘዕብይዎን ዝነበሩ ኸዓ፡ ናይ ኵልና፡ ናይ መንግሥትናን ሕብረተሰብናን ፍፁም ፍቕርን ምሕብሓብን ምትሕብባርን፡ ንከይፍለዮም ኣብ’ዙ ኣጋጣሚ፡ መንፈሳዊ ፃውዒተይን ለበዋይን አቕርበልኩም፡፡

ኣብ ዙርያ’ዙ ቅዱስ ደብርና ኰይንና፡ በዓልና እንክነኽብር፡ ሃይማኖታዊ፡ መንፈሳዊ፡ ስነልቦናዊ፡ ማሕበራዊ፡ ቁጠባዊ፡ ጸገማት ኣብ ቅድመና ተሠጢሖም ከምዘለዉ ንግንዘብን ንርኢን ኣሎና፡፡ ስለዙይ ንቅድሚት ኣብ እምነትና ኮነ ኣብ ሕይወትና ንዝገጥሙና ፈተናታት በብመጠኖምን መገዶምን ንምሽናፍን ንምሕላፍን፡ ምስ ፈጣሪና፡ ኣብ እምነትና ብምጽናዕ፡ መንፈሳውን ማሕበራውን ሕብረትና ብምሕላውን ብምምዕባልን ጥራሕ ኢና ክንፈትሖም እንኽእል፡፡ ኣብ ውሽጢ ቁምስናና ይኹን ኣብ ጐረባብቲ ቁምስናታት ዝርከቡ ዘይምቅድዳዋት ፈቲሽና፡ ብዕርቅን ብምርድዳእን ብምፍታሕ፣ ፍቕርን ስምምዕን ብምግባር፣ ምምኽኻርን ምድግጋፍን መሣርሒና እንተገይርና፡ ን’እቱ ኵሉ ዘፍርሐና ዘሎ ነባራዊ መጨነቒ ጸገማትና ብዝቐለለ መንገዲ ክንሰግሮ ምዃንና እኣምን፡፡

ናይ ደቅና፡ ናይ መናእሰይ መሓብር ብምብጥንዃር፡ ብመንፈስን ብቁጠባውን መንፈሳውን መዳያት ምንቅስቃሳት ብምግባር፡ ክንበራታዕ ኣገዳሲ ኢዩ፡፡ ካብ ብዙሕ ፈተናታት ንምውጻእ’ውን ዘኽእለና ቀንዲ መንገዲ ኢዩ፡፡

ኣብ ርድኢት እምነቱ ዝበሰለ ማሕበረሰብ ንምፍጣር፡ ናይ ትምህርተ ክርስቶስ ክርስቲያናዊ ህንፀት ከካብ ቤትና፡ ካብ ስድራ ኢዩ ክጅመር ዘለዎ፤ ንዙይ ከዓ ንስኻትኩም ከም ምእመናን፡ ንሕና ከዓ ከም ቤተክርስቲያን ዝከኣለና ንምግባር ኣምላኽ ይሓግዘና፡፡

ኵልኹም ፍቁራን ምእመናን፡ ኣቦታት ኣደታት፡ ካህናት፡ ደናግል፡ መንእሰያት፡ ከምኡ’ውን ኣብዙ በዓል ክትሳተፉ ዕድል ረኺብኩም ዘሎኹም፡ ብጽቡቕ ምትሕብባርን ሕውነትን ጕርብትናን እነመስግነኩም፡ ናይ ኦርቶዶክስን እስልምናን እምነት ተኸተልቲ፡ ናይ ኣዎ ቅዱስ ሚካኤል ቁምስና መበል 100 ዓመት ኢዮቤል መኽፈቲ በዓል እንክነኽብር፡ ንዓመት ብዝተፈላለዩ መንፈሳውን ማሕበራውን ናይ መንፈስ ሕንፀት መደባትን ንጥፈታትን ሓቢርና ብምስላጥ፣ ኣብ ናይ’ዙ ዓመት መወዳእታ ኣከባቢ፡ መዓልቲ ብምምራጽ ሓቢርና ንቅዱስ ሚካኤል ብሓለዋኡ፡ ንእግዚኣብሔር ኣምላክና ከዓ ንዓቢዪ ምሕረቱን ልግሱን ሓቢርና እነመስግነሉ መዓልቲ ክህሉ ይሕሰብ፡፡ ካብ ቁምስና ጀሚሩ ክሳብ ወጻኢ በቢቦታኡ ኮሚቴ ብምውጻእ፡ ን’ዙ መበል 100 ዓመት ኢዮቤል ቁምስና ቅዱስ ሚካኤል ኣዎ ምክንያት ብምግባር፡ ኣብ ኣገልግሎት ቤተክርስቲያን መደባትን ስልጠታትን ኣጽኒዖም ብምትላም፡ ብተግባር ንምርኣይ ኣብ ምንቅስቓስ ዝርከቡ ኮሚቴታት ከምዘለዋ ብቐረባ እንፈልጦ ስለኾንና፡ ንኵላቶም ኣብ ዘዘለዉሉን ኣብ ዝሠርሕዎን ኵሉ እግዚኣብሔር ክባርኾምን ኣሳልጦ ክህቦምን ብጸሎትናን ብትምኒትናን ነሰንዮም፡፡

“ምሕረት ሰላም ፍቕሪ ይብዘሐልኩም!!” (ይኁ.1፡2)
ብሩኸ በዓል መበል 100 ዓመት ኢዮቤል ቁምስና ቅዱስ ሚካኤል ይግበረልኩም ይግበረልና፡

“ብመንፈስ ምሳኻትኩም እየ፡ ሥርዓትኩምን ጽንዓት እምነትኩም ብክርስቶስን እናርኤኹ’ውን እሕጐስ ኣሎኹ። ደጊም ከም’ቱ ንጐይታና ክርስቶስ ኢየሱስ እተቐበልኩምዎ፡ ከምኡ ኢልኩም ብእኡ ተመላለሱ። ኣብኡ ተሰሪትኩምን ተሃኒጽኩምን ብምስጋና መሊእኩም፡ ከምቲ እተመሃርኩምዎ ዄንኩም ብእምነት ጽንዑ።” (ቆሎሴ.2፡6-7)

+አባ ተ/ሥላሴ መድኅን
ካቶሊካዊ ጳጳስ ዘመንበረ ዓዲግራት