ኣብ ወረዳ ኢሮብ ብልዕሊ 5 ሚልዮንን 938 ሽሕ ብር ወፃኢ ዝተሃነፀን ብልዕሊ 2 ሚልዮንን 413 ሽሕ ብር ድማ ሕድሳት ዝተገበረሉን ኣብያተ ትምህርቲ ተመሪቖም።

ሙሉእ 1ይ ብርኪ ቤት ትምህርቲ ቅዱስ ሚካኤል ኣዎ ኣብ ወረዳ ኢሮብ ካብተን ኣብ ጀኖሳይዳዊ ኲናት ትግራይ ብሰንኪ ታሪካውያን ፀላእቲ ህዝቢ ትግራይ ብዝኸፍአ መንገዲ ዝለዓለ ጉዳኣት ዝበፅሕን ኣብያተ ትምህርቲ ወረዳ ኢሮብ ሓንቲ እያ። እዛ ቤት ትምህርቲ ዕንወት እኳ ዝበፅሓ እንተኾነ ሕዚ ግና ንሕና እናሃለና ደቅና ኣይድንቁሩን ብምባል ቤት ፅሕፈት ካቶሊካዊት ቤተ ክርስትያን ሰበኻ ዓዲግራት ምስ ትካል ካቶሊካዊት ተራድኦ ሲኣርኤስ ብምትሕብባር ብልዕሊ 5 ሚልዮንን 938 ሽሕ ብር ወፃኢ ተሃኒፁ ከም ዝተመረቐ ሓበሬታን ርክብን ወረዳ ኢሮብ ፀብፂቡ።

ኣብታ ቤት ትምህርቲ በዓል ኣርባዕተ መምሀሪ ክፍልታት ሙሉእ ህንፃ ተሰሪሑ ናብ ኣገልግሎት ውዒሉ ኣሎ ዝበለ እቲ ሓበሬታ፣ ከምኡ እውን ሓደ ዝፀንሐ ኣርባዕተ ብሎክ መምሀሪ ክፍልታት ምግጣም ናሕሲ ፥ መሽኮትን በርን ካልኦትን ተሰሪሖም ንፍፃመ ከምዝበቕዐ ኣመልኪቱ። ንፅሬትን ስነ ፅሬትን ኣገልግሎት ዝህቡ ሮቶታት ከምዝተተኸሉን ኣብቲ ቤት ትምህርቲ ሓደ ክፍሊ ተምሃራይ ከተኣናግድ ዝኽእል ሙሉእ ወናብር፣ ካብ 1ይ ክሳብ 8ይ ክፍሊ ንዝርከቡ ተምሃሮ ናውቲ ትምህርትን ንከይዲ ምምሃር ምስትምሃር ዝሕግዙ መሳርሒ ፅሕፈትን ክማለአሎም ከምዝተገበረ እውን ተሓቢሩ እዩ።

ኣብቲ እዋን ዋና ኣማሓዳሪ ወረዳ ኢሮብ መምህር እያሱ ምስግና ከምዝበሉዎ፣ ትካል ካቶሊካዊት ተራድኦ ሲኣርኤስ ምስ ህዝቢ ኢሮብ ነዊሕ ምትእስሳር ዘለዎ ኮይኑ፣ ኣብ ሰብኣዊ ሓገዝ፣ ስራሕቲ ልምዓት፣ ትካላት ማሕበራዊ ኣገልግሎታትን ካልኦትን እናማለአ ዝመፀ ትካል እዩ። ብተወሳኺ ኣብ እዋን ፅንተት ኣፀጋሚ ቦታታት እናሰገረ ሓጊዙ እዩ። ሕዝውን ድሕሪ ነዊሕን መሪርን ኩናት ዋላ ከም ወረዳ ብሙሉእነት ካብቲ ፀገም ኣይንውፃእ ንተነፃፃሪ ሰላም ብምጥቃም፣ዝዓነዋ ኣብያተ ትምህርቲ ኣብ ምህናፅ፣ ናውቲ ትምህርቲ ኣብ ምምላእን ደረጅኡ ዝሓለወ ቤት ትምህርቲ ኣብ ምህናፅ ዝገብሮ ዘሎ ኣበርክቶ ኣመስግን ኢሎም። ብፍላይ ብዘይ ዝኾነ ይኹን ሰጋእ መጋእ ናብዚ ብምምፃእ ኣብ ሓፂር እዋን ህንፃ ሰሪሖም ኣረኪቦምና ኣለው። ስለዚ ነቲ ዝገበሩልናን ሕዚውን ንዝፈፀምዎ ቅዱስ ተግባር ብሓፈሻ ንኩለ መዳይ ደገፎም ብስም ህዝቢ ኢሮብን ምምሕዳርን የመስግን ኢሎም።

ኣብ መወዳኣታ ኣይተ ኣሰፋ ገብራይ መተሓባባሪ እቲ ፕሮጀክት ናይዚ ስነ ስርዓት ምረቓ ቀንዲ ዕላማ ብገበርቲ ሰናይ ተሰሪሑ ዘሎ ስራሕቲ ቐፃልነት ዘለዎ ግልጋሎት ንሕብረተሰብ ክህብ እንተዳኣ ኮይኑ ተሳትፎ ሕብረተሰብ ከም ዝጠልብን ግንዛበን ተበግሶን ክንወስድ ከምዝግባእ ብምትእምማን ሰብ ሃብቲ ደገን ውሽጥን ዓዲ ይኹን ካልኦት መድረግቲ ኣካላት ኣብ ዙርያ ትምህርቲ ክሕግዙን ክረባረቡን ይግባእ ኢሎም ከም ፀብፃብ ሓበሬታን ርክብን ወረዳ ኢሮብ።

ብተዛማዲ ዜና፣ ካቶሊካዊት ቤተ ክርስትያን ማሕበራውን ልምዓት ኮሚሽን ዓዲግራት ምስ ዓለም -ለኻዊ ምግባረ ሰናይ ሲኣርኤስ ብምትሕብባር ኣብ ጣብያ ሓረዘ ቤት ትምህርቲ ሰብዓታ ቅድስቲ ስላሰ፣ ሽዱሽተ ክፍልታት መምሃሪ ክፍሊ ብልዕሊ 2 ሚልዮንን 413 ሽሕ ወፃኢ ሕድሳት ከምዝተኻየደ ተገሊፁ። እቲ ቤት ትምህርቲ ሓደ ብሎክ መናፅሂ ማለት እውን 4 ክፍሊ ዝሓዘ ከም ብሓድሽ ብምስራሕ ፥ሓፁር ቤት ትምህርቲ መእተዊ በሪ፣ ሓፁር ትሪኳላታን ካልኦትን ዘካተተ ኮይኑ ተዛዚሙ ንማሕበረሰብ ከምዝተረከበ ድማ ተሓቢሩ ኣሎ።

ቤት ፅሕፈት ጉዳያት ኮሙዩኒኬሽን ትግራይ
29 ጥሪ 2016 ዓ.ም
መቐለ