ከኢትዮጵያ ካቶሊካዊት ቤተ ክርስቲያን የጳጳሳት ጉባኤ የተላለፈ መዕልክት


“ጌታ ሆይ ጸሎቴን ስማ
ጩኸቴም ወደ አንተ ይድረስ
በመከራዬ ቀን ፊትህን ከኔ ወዲያ አትመልስብኝ” መዝ. 102፡1-2

ሀገራችን ኢትዮጵያ ባለፉት አመታት በተለያዩ የፖለቲካ ሥርዓቶች ውስጥ አልፋለች፤ በእነዚህም የፖለቲካ ሥርዓቶች ውስጥ ችግሮቻችንን በመወያየት በአብሮነት፣ በወንድማማችነት፣ የሁሉንም ዜጎች የጋራ ጥቅም ባከበረ መልኩ መፍታት ሳንችል ስለቀረን ጦርነትና ኃይልን ብቸኛ አማራጭ አድርገን በመውሰዳችን የብዙ ዜጎች ደም በከንቱ ፈሷል። ብዙዎች ለአካል ጉዳትና ለስነልቦና ቀውስ ተዳርገዋል፡፡ ብዙዎች ተሰደዋል፣ ለትውልድ ይተርፍ የነበረ ሐብትና ንብረት ወድሟል፡፡ ይህ በመሆኑ ምክንያት ሐዘን ሁሉም ቤት አንኳክቷል፡፡ ዛሬም እያንኳኳ ይገኛል፡፡

ባለፉት ቅርብ ዓመታት በትግራይ ምድር እንዲሁም በአማራ፣ በአፋር፣ በኦሮሚያ፣ በቤንሻንጉል ጉምዝ፣ በደቡብ፣ በሱማሌና በጋምቤላ እንዲሁም በሌሎች አካባቢዎች በተካሄዱት ጦርነቶችና ግጭቶች የፈሰሰው የዜጎች ደም ሁላችንንም ከልብ አሳዝኖናል አንገትም አስደፍቶናል። ውይይትንና መግባባትን ማስቀደም ባህላችን በማድረግ ፈንታ ወንድም በወንድም ላይ ሰይፍን በማንሳቱ ዜጎች ህይወታቸውን ሰቆቃ በተሞላ ሁኔታ እንዲኖሩ ሆኗል።

በያዝነው ሳምንት በትግራይ ምድር በተደረገው ጦርነት ህይወታቸውን ያጡ ወገኖች ለቤተሰቦቻቸው የማርዳት ሥራ እየተከናወነ ስለሆነ የብዙዎች ልብ በከፋ ሐዘን ከብዷል። ይህንን ሳምንት በሐዘን ወገኖቻችንን እንድናስብ የክልሉ መንግስት ማወጁን ምክንያት በማድረግ የኢትዮጵያ ካቶሊክ ቤተክርስትያን ጳጳሳት ጉባኤ የተሰማንን ጥልቅ ሐዘን መግለጽ እንወዳለን። ልዑል እግዚአብሔር ነፍሳቸውን በገነት ከቅዱሳንና ከጻድቃን ጋር ያኑርልን እንላለን። ቤተክርስቲያናችን ከሚያዝኑ ወገኖች ጋር ታዝናለች፣ ከሚያለቅሱትም ጋር ታለቅሳለች። ነገር ግን እንደጌታ ትእዛዝ ቤተክርስቲያን ሐዘኗም ለቅሶዋም ሙታንን ድል አድርጎ በተነሳው በክርስቶስ ባላት ተስፋ ላይ ሆና ነው፡፡ በድጋሚ እግዚአብሔር የሞቱ ልጆቻችንን ነፍስ በገነቱ ያሳርፋቸው፡፡ ውድ ልጆቻቸውን ላጡ ቤተሰቦች መፅናናትን እንመኛለን። በተጨማሪም ልጆቻቸው መሞታቸውን ያልተረዱ ወላጆች እንዳሉ እናምናለን፡፡ ለእነርሱም ነፍስ ቤተክርስቲያናችን ትፀልያለች፡፡

አሁንም በአማራ ክልል እየተደረገ ባለው ጦርነት ስለሚሞቱ ሰዎች ቤተክርስቲያናችን ሐዘኗን ትገልጻለች። ስለእነርሱ ነፍስ በእግዚአብሔር ፊት ቀርባ ጸሎቷን ታቀርባለች። ዛሬም ካለፈው ስህተታችን እየተማርን ባለፈው ባጠፋነው እግዚአብሔር እንዲምረን ንስሐ እየገባን እርስ በእርሳችን በፍቅር በመወያየት ችግሮቻችንን ለመፍታት ይቅር እየተባባልን ጦርነትን በማስወገድና በፍቅር እንደ ወንድማማቾች አብሮ መኖርን ብቸኛ አማራጭ አድርገን እንድንይዝ ቤተክርስቲያን አጥብቃ ትማፀናለች። እግዚአብሔር አብሮ የመኖርን ጥበብ እንዲያድለን ትፀልያለች።

ጌታ ሆይ ለሞቱት ወንድሞቻችንና እህቶቻችን የዘላለም እረፍት ስጣቸው
የማያልቅ ብርሃን አብራላቸው
በሰላም አሳርፋቸው!
በሐዘን ለተጨነቁ ቤተሰቦችም መጽናናት ስጣቸው አሜን!

ከኢትዮጵያ ካቶሊካዊት ቤተ ክርስቲያን የጳጳሳት ጉባኤ
አዲስ አበባ
ጥቅም 6 ቀን 2ዐ16 ዓ.ም.