IRROB.ORG

Home » የአባ ተስፋማርያም አስታየቶች » ፈጣሪና ፍጡር ሰው

ፈጣሪና ፍጡር ሰው

እግዚአብሔር ነው ሁሉን የፈጠረ፣
ሥራውም እጅግ በጣም ያማረ፣
ፍጥረቱን ሁሉ በችሎታው ያስተዳደረ፤
ማንም የለም ከርሱ በላይ ያደረ፤
ከሳጥናኤል በስተቀር በትዕቢቱ የፎከረ፣
ስለመሰለው ከፈጣሪ ጋር የተወዳደረ፤
ወደ ገሃነም እሳት ተጥሎ የቀረ።
ፍጡር ሰውም በፈጣሪው ላይ እያማረረ፣
በኃጢአቱ ላይ ክፋትን እየጨመረ፣
በወገኑም ላይም በጣም እያከረረ፣
ከሰይጣን ጋራ ደግሞ እያበረ፣
በኃጢአት የእግዜር ጸጋን አጥፍቶ እየኖረ፣
እውስጡ ኅሊናው በጣም እየተሸበረ፣
ተዋርዶ ይኖራል ሆኖ ሳለ በጣም የከበረ፣
በአምላክ መልክና አርአያ የተፈጠረ፤
ተፈጥሮውንም በእውቀቱ የተቈጣጠረ፣
በተሰጠው አእምሮ እየተመራመረ፤
ሆኖም እርስበርሱ በእምነት ላይ እየተከራከረ፣
ልዩነትንም በሃይማኖት ላይ እየፈጠረ፣
ዘንግቶ በአንድ ፈጣሪ እንዳልተፈጠረ፣
የእርስበርስ የወንድማማችነት ፍቅሩ እየሻከረ፣
በክፋቱ ብቻ ከእግዚአብሔር ፊት ተባረረ።


ፈጣሪ ግን በታላቅ ቸርነቱ
እንዲመለስ ወደ ፈጠረው አባቱ፣
እንዲያኖረውም በሰማያዊ ቤቱ፣
ጸጋውን ይሰጠዋል በየወቅቱ፣
በዚህ ዓለም እንዳይጠፋ በከንቱ፣
እንደ ዲያብሎስ የተኰነነ በትዕቢቱ፣
ሰውን በኃጢአት የሚያንቅ በአንገቱ፣
እየፈተነው ይገኛል እስከ ዕለተ ሞቱ፤
ወደ አባቱ ቤት እንዳይመለስ እንደ ፊቱ፣
በጸጋም እንዳይጐለብት እንዳይሆን ብርቱ፣
በትዕቢት ያቈስለዋል እስከ መሬት ግባቱ።

%d bloggers like this: