IRROB.ORG

ሰው በጥላቻ ከሰከረ

ሰው በጥላቻ ከሰከረ፣
በአንድ ፈጣሪ እንዳልተፈጠረ፣
አንዱ በሌላ ላይ እየፎከረ፣
ሌላውን በክፋት እየመከረ፣
ግንኝነቱ ከአምላኩ ጋር ሻከረ፤
ሕይወቱ በፍቅር ስላልዳበረ፣
ከእግዜር ጸጋ ሁሉ ከሰረ፤
ክፋትን ብቻ ከሰይጣን እየተማረ፣
በኃጢአትም ተዘፍቆ እየኖረ፣
ሰው ሁሉ በእርሱ ምክንያት ተማረረ፤
እውስጡ በጥላቻና ንዴት እያረረ፣
የኅሊና ሰላምን አጥቶ እያደረ፣
በንዴቱና ቍጣው ሕዝብን አሸበረ፣
ሁሌ ሰላምን ለማደፍረስ እየጣረ።


በጥላቻ ምክንያት ወገን ሁሉ ተለያየ፣
መልካሙን ትቶ ክፉውን ብቻ እያየ፣
ከጽድቅ ይልቅ ኃጢአትን እየገበየ፣
ከአምላክ ይልቅ ከሰይጣን እየተወያየ፣
የአገርና የወገን ተቈርቋሪ ነኝም ተብየ፣
ይኖራል ሕዝብን እያፋጀና ሰላምን እየጋየ።


ሰው በጥላቻ ከተሞላ፣
ሰላምንና ዕርቅን እየጠላ፣
በንዴትና ቂም አንጀቱ እየተበላ፣
የጠላውን ስለማይወድ በጠቅላላ፣
ይኖራል እየኰነነ ሰውን በጅምላ፣
እንደ ሰከረ ሰው በጠላ፣
እንደ በሰበሰና እንደገማም ገላ፣
ያሸሻል ብዙ ሰውን ወደኋላ፣
ምንም ስለሌለው የፍቅር ሜላ፣
ይሞታልም የእግዜር ሕግን ሳያሟላ።


ዘፋኙ በጥላቻና ስለጥላቻ ከዘፈነ፣
ካምላክና ከሰው ፍቅርም ከቦዘነ፣
አንድ ሕዝብ ከወገኑ ብቻ ከወገነ፣
እግዚአብሔርን በጣም ስላሳዘነ፣
ይቈጠራል ነፍሱን አጥፍቶ የተኰነነ፡፡


ጥላቻ ጠንቅ ነው ለሰው ደስታ፣
ሰውን ሁሉ ከፍቅር እየገታ፣
ሰላምንና ዕርቅን በመፈለግ ፈንታ፣
ሕዝብን ይጐዳል በቦምብ ፍንዳታ፤
የታሰረም ከእስር ቤት እንዳይፈታ፣
ምክንያት ነው ሰው እንዲንገላታ፣
ጥላቻ በፍጹም ጠንቅ ለሰው ልጅ ደስታ!

%d bloggers like this: