IRROB.ORG

የትዕቢት ፍሬ

   

 

  

    

free counters

ትዕቢት በማን እንደ ተጀመረ

ትዕቢት በማን ተጀመረ፣
ተብሎ ከተመረመረ፣
ጊዜውም ከተቈጠረ፣
ሳጥናኤል ልክ እንደተፈጠረ፣
ለፈጣሪ አንገዛ ብሎ መከረ፤
ከእርሱም እኩል ነኝ እያለ ፎከረ፤
በአምላክ ሥልጣን እየተማረረ፣
በጥላቻውም እያረረ፣
ለሽፍትነት ወደ በረሃ በረረ፤
ነገሩም ሁሉ በጣም እየተካረረ፣
በጥፋት ላይ ጥፋትን እየጨመረ፣
ከፈጣሪ ጋራ እየተወዳደረ፣
ዓለምን በትዕቢት ለመግዛት ጀመረ፤
ከፈጣሪው ጋራ ግኑኝነቱ ሻከረ፤
ከመላእክትነቱም ሥልጣን ተሻረ፤
ወደ ገሃነመ እሳትም ተወረወረ፤
ከመንግሥተ ሰማይም ለዘወትር ተባረረ፤
ለዘላለምም በገሃነም ታሰረ፤
በዕብሪቱም በሁሉም ነገር ከሰረ፤
ገና በዚሁ ስላተበገረ፣
ሰው ገና እንደ ተፈጠረ፣
በለቡ ገብቶ አደረ፤
ኑሮውን ሁሉ አስሸበረ፤
በፈተናው ስለ ተወጠረ፣
ሰው ከሰይጣን ጋራ አበረ፤
በትዕቢትም ልቡ ወፈረ፤
ጸጋው ሁሉ ስለ ተቦረቦረ፣
ከሁሉም ጋራ እየተከራከረ፣
የሌላን አበሳ ሁሉ እየዘረዘረ፣
ፊቱንም ወደ ሰይጣን እያዞረ፣
በቂምና በቀል እየተቀረቀረ፣
ለዲያብሎስ ምርኮኛ ሆኖ ቀረ።


ስለ የሰው ዕውቀትና ዕብሪት

ይገርማል የምሁሩ ሰው ነገር፣
ሁሉን አውቃለሁ እያለ ሲናገር፣
ሳይንስን ብቻ እያደረገ መፈክር፣
ትዕቢት በተሞላበት ዕውቀቱ ሲያስተምር፤
ትሑቱንና አማኙን በማደናገር፣
እያለ የለም ፈጣሪ እግዚአብሔር፤
አልፈጠረም ሰማይን ሆነ ምድር፣
የለም ሌላ ፈጣሪ ከሰው በቀር፤
ሰው ከሆነማ የወጣው ከመሬት አፈር፣
በኢቮሉሽን ሂደት በመቀያየር፣
በተፈጥሮ ሕግና ሂደት በመዳበር፣
ወዳለበት ደርሷል በዕውቀት ምርምር፤
በራሱ ብቻ ተማምኖ በዓለም ለመኖር፣
ሕያው ሆኖ ሊቀር ሳይወርድ ወደ መቃብር፣
ይታያል ከፈጣሪ ጋራ ሲወዳደር፤
እየሞከረም ነው ሰውን ለመፍጠር፣
በላቦራቶሪ ቴክኖሎጂ በጂን ምርምር፣
ተሎ እደርስበታለሁ እያለ ሲፎክር።


ትዕቢተኛ ሰው

በትዕቢት የተያዘ፣
ከጸጋ የታረዘ፣
ወደ ዲያብሎስ የተጓዘ፣
ከፈጣሪ ጨርሶ የተወገዘ፣
ነፍሱ በጣም ስለተመረዘ፣
በንዴትና ክፋት ተቅበዘበዘ፤
አአምሮው ጨሪሶ ፈዘዘ፣
ሰላምን አጥቶ የተከዘ፣
ከፍቅር ሥራ ሁሉ ደነዘዘ፤
ከሰይጣን ጋር እየፈነጠዘ፣
ሓቅን ከውሸት ጋራ እየበረዘ፣
የሰውን ሕይወትና ሰላም በዘበዘ፤
እርሱ ብቻ ሁሉን ካላዘዘ፣
የጠብ ሴፍ ተመዘዘ።


ሰው በትዕቢት ከተነፋ
ምንም የለውም ተስፋ፤
የትሕትናን ጸጋ ስላጠፋ፣
ኃጢአቱና አበሳው እየከፋ፣
ሕይወቱና ሥራው ሁሉ ከረፋ፤
በንቀት ስድብን በሰው ላይ እየተፋ፣
ይጠላል በሁሉም ዘንድ በይፋ፤
ነፍሱን ያጠፋል ወደ ገሃነም እየገፋ፣
ሌላውን እያደከመ ለራሱ ምንም ሳይለፋ።

 

 

 

 

%d bloggers like this: