IRROB.ORG

Home » የአባ ተስፋማርያም አስታየቶች » እምነት ባይኖር ኖሮ

እምነት ባይኖር ኖሮ

እምነት ባይኖር ኖሮ
ሰው በቀረ ነበር ደንቍሮ፤
በኖረም በተስፋ እጦትና እሮሮ፣
ባላመለጠም ከዲያብሎስ ጐረሮ፣
ብርሃንን ከማየት ታውሮ፣
በማይፈታ ሰንሰለት ታስሮ፣
እንዲኖር ከሰይጣን ጋራ አብሮ።


 እምነት ነው የአእምሮ ብርሃን

እምነት ነው የአእምሮ ብርሃን፣
ከድንቍርና ወደ ዕውቀት የሚመራን፣
የፈጣሪ ህላዌን ለማመን የሚረዳን፣
ከፈተናና ስሕተት የሚያወጣን፣
ከኵነኔና ጥፋትም የሚያድነን፤
ፈጣሪዎች ሳይሆን ፍጡራን መሆናችንን፣
በትዕቢት ሳይሆን በትሕትና የሚያሳምነን፣
በጥላቻ ሳይሆን በፍቅር ተሳስረን፣
የአንድ አባት ልጆች እንደመሆናችን፣
በሰላም በአንድነት እንድንኖር የሚያደርገን፣
ለዘላለምም ሕይወትን የሚያስወርሰን።


ጠንካራ እምነት

በእምነቱ በጣም ጠንካራ፣
ታላቁን የሕይወት ኑሮን ተራራ፣
ይወጧል ምንም ሳይፈራ፣
ከአምላክ በተሰጠው አደራ፣
ሥራው ሁሉ ወደ ላይ እየተንሰራራ፣
ለሁሉም እኩል በቅን ስለሚሠራ፣
ሁሉን በፍትሕ ያስተናግዳል በየተራ፣
በበጐነት ሥራ ከአምላክ ስለሚጋራ፣
አርአያ ነው እንደ ብርሃን የሚያበራ፣
ከጥፋት መንገድ ወደ ደኅንነት የሚመራ።


ሰው በፈጣሪ ካመነ

ሰው በፋጣሪ ካመነ፣
በሰው ላይም ካልወገነ፣
አምላክን ስላላሳዘነ፣
ከኵነኔ ሁሉ ዳነ፤
ከመልካም ሥራ ስላልቦዘነ፣
እንደ ወርቅ በእሳት የተፈተነ፣
ይሆናል ታሪኩና ስሙ በዓለም የገነነ፣
በሰው ዘንድም በጣም የተመሰገነ።


ሰው በፈጣሪ ካላመነ

ሰው በፈጣሪ ካላመነ፣
እየመሰለው በዕውቀቱ የገነነ፣
በእምነቱ ግን በጣም የመነመነ፣
እንደ ጭስ ወደ ላይ የበነነ፣
እንደ አቧራ በንፋስ የተበታተነ፣
በትዕቢቱ ከሰይጣን ጋራ የወገነ፣
በነፍሱ ላይ በጣም ስለጨከነ፣
ጠፍቶ ይቀራል እንደ ተኰነነ፣
ተፀፅቶ ከፈጣሪ ምሕረትን ካልለመነ።


በፈጣሪ አለመተማመን

ሰው በፈጣሪ ካልተማመነ፣
ቢመስለውም በጣም የሰለጠነ፣
በአሳሳች ትዕቢት እየተፈተነ፣
ከአምላክ ይርቃል ከሰይጣን እየወገነ፤
እራሱን ያጠፋል መጥፎውን እየወሰነ፣
ሥራው ሁሉ ፍሬ-ቢስ ከጸጋ የመከነ፤
በትሕትና ተፀፅቶ ምሕረትን ካለመነ፣
መጥፋቱ አይቀር በእምነቱ እንደመነመነ፣
በሕይወቱ ላይ በጣም ስለጨከነ።

%d bloggers like this: