IRROB.ORG

Home » የአባ ተስፋማርያም አስታየቶች » በፖለቲካ የተመረዘ

በፖለቲካ የተመረዘ

ሰው በፖለቲካ ከተመረዘ፣
ፍቅርን ከጥላቻ እየበረዘ፣
ከእግዚአብሔር ጸጋ ስለታረዘ፣
እውስጡ ሰላምን አጥቶ ተቅበዘበዘ፤
ደስታ የለውም ሁልጊዜ እንደ ተከዘ፣
ጽናት የለውም ልቡ እየተወዛወዘ፣
ዕረፍት አይሰጥም ሁሉን በውሽት እየወገዘ፤
ወደ ነፍሱ ተመልሶ በአምላክ ጸጋ ካልታገዘ፣
በጥበቡና በችሎታው ሁሉን የያዘ፤
ሰው ግን ፍጡር ሳለ በትዕቢት ልቡ ከደነዘዘ፣
መጥፋቱ አይቀር ተፀፅቶ ኃጢአቱን ካልተናዘዘ።


ሰው በፖለቲካ ካበደ፣
ልቡ በንዴት ብቻ እየነደደ፣
ይቈጠራል ፈጣሪውን የካደ፤
ስሜቱን ብቻ እየወደደ፣
ኃጢአቱም በጣም ስለከበደ፣
በሌላ ሕይወት ላይ እየነገደ፣
ጥላቻን ብቻ ስለ ለመደ፣
ከሰይጣን ጋራ እየተዛመደ፣
ይቈጠራል እገሃነመ እሳት የወረደ።


በፖለቲካ የታመመ ሰው

ሰው በፖለቲካ በሽታ፣
የጠላውን እንዲያንገላታ፣
የተቃወመውን በጥይት እንዲመታ፣
ይርቃል ከፈጣሪው ጌታ፤
ቍጠኛ ነው ጥዋት ከማታ፣
እራሱን ከእግዜር ጸጋ ስለገታ፣
ምንም የለውም አንዳችም ደስታ፤
ይታያል ለሰው እንዳንድ ወስላታ፣
የተጠላ ይሆናል በየሄደበት ቦታ፣
እየታየ እንደ ሰይጣን መንታ፣
የማይሰጥ ለኅብረተሰብ የሰላምን እፎይታ።

እግዚአብሔር ብቻ አያምጣ፣
የፖለቲከኞች ቍጣ፤
አንዱ የጠላውን ሊቀጣ፣
መሳሪያን ይዞ ወጣ፤
ጥይትም እንደተልባ ተንጣጣ፤
ኤረ አቍም የሚል ታጣ፣
ለሰው ልጅ ሰላም እንዲመጣ፣
ፈጽሞ የተሻለ መልካም ዕጣ፣
መንገዱ ያልሆነ አባጣ-ጐባጣ፣
በወገን ላይ የማያመጣ ሌላ ጣጣ።


በፖለቲካ አበሳ፣
ሰው ፈጣሪን እየረሳ፣
ድሃ ሰው በረሃብ ሲከሳ፣
ወገን ለወገኑ እንዳይሳሳ፣
ሌላው ለጦርነት ተነሳ፤
ከጦርነትም የቀረ ቍስለኛና አንካሳ፣
በልቡ እያሳደረ መጥፎ ጠባሳ፣
እስከ ዕለት ሞት የማይረሳ፣
ወለዶው ሁሉ በፍጹም እንዳይረሳ፣
ሌላው ይኖራል ይኸንን እያወሳ።


 ፖለቲካ ፖለቲካ፣
ስሜትን የሚነካ፣
ሰው በኃይሉ እየተመካ፣
በንዴትም ሆዱ እየቦካ፣
የሌላውን በደል ብቻ እየለካ፣
በምንም ዓይነት ልቡ ስለማይረካ፣
ጠበንጃን አንግቦ ይገባል እጫካ።


ወገኖቼ እስቲ ልብ አድርገን እንስማ፣
ስለ ፖለቲካ ነገር ብንስማማም ባንስማማ፣
የፖለቲካ ሥራ በጣም ነው የገማ፤
ወገንን እየከተተ ከማይወጣበት ጥላቻና ጨለማ፣
ከፈጣሪ በላይም እያስመለከ ሰንደቅን አላማ፣
ሰውን ያነሳሳል ለጦርነት አውድማ፣
እያስመሰለ ኋላ ሀገር እንደሚለማ፣
ሕዝብን ያስጨርሳል እርስበርስ በከንቱ እያደማ።


ይህ ከሆነ የፖለቲካ ሥራ፣
ለምን አንቃወመውም በጋራ፣
ሰው በፍቅርና በበጎ ሥራ እንዲሰማራ፣
እርስ በርሱም በሰብአውነት እንዲራራ፣
ትቶ የጥላቻን ዘመቻና ወረራ፤
በሀገሩና በወገኑ ደኅንነት ብቻ እንዲጋራ፣
ወደ ሰላምና ልማትም እንዲያመራ፣
በዓለምም በሀገሩም እንደ ብርሃን እንዲያበራ፣
ጥላቻና ክፋት ቀርቶ ስሙ በጥሩ ብቻ እንዲጠራ።

%d bloggers like this: