IRROB.ORG

መኖር ከቂም

መኖር ከቂም

መኖር ከቂምታ፣
ወደ ገሃነም ቀጥታ፣
ለዘላለም የሥቃይ ቦታ፣
የሌለው አንዳችም ጸጥታ፣
የማይገኝበት የሕሊና እፎይታ፣
ምንም የለውም አዎንታ፣
ሁልጊዜ ሕይወት አሉታ፣
ስለሌለበት የጸጋ ሥጦታ፣
ቂም በእውነቱ የመንፈስ በሽታ፣
ሰውን በበቀል የሚያንገላታ፣
በነፍስ ውስጥ እየፈጠረ ዉካታ፣
ስለተረሳ የፈጣሪ ምሕረትና ውለታ፣
የኵነኔ ጥፋት ይመጣል ለበርካታ፣
በፍርድ ቀን ከኃያሉ ፈጣሪ ጌታ።


ከቂም ጋር በዓለም መኖር
ያርቃል ከእግዚአብሔር፣
ከልብ ስለጠፋ የእርሱ ፍቅር፣
ምንም አይቻልም መሆን ገር፤
ለማለትም በደልን ይቅር፤
ሞቶ እስከ ዕለተ ቀብር፣
እስከሚገባ በገሃነም በር፣
ከሰይጣን ጋራ ለዘላለም ለመኖር።


ቂመኛ

መናገር ስለ ቂም
ማንንም ደስ አያሰኝም፣
ፍቅርን ስለሚያወድም፤
ለቂመኛ ወዳጅ ወንድም፣
ዬትም አይገኝለትም፤
እውስጡ ስለሌለ ሰላም፣
ኀዘንተኛ ነው እጅግ በጣም፣
ለማንም የማይሆን ጥቅም፣
ብቸኛ ሆኖ የቀረ ለዘላለም፤
ከፈጣሪው እንደ ሸፈተው አዳም፣
ቃኤልም የገደለው የራሱን ወንድም፣
በላዩ ላይ በማምጣት ትልቁን መርገም፣
ሕይወቱ የተረበሸ ባፈሰሰው ደም።


የሰው ቂመኛ፣
በጣም ነው አደገኛ፣
የወጣለት እልኸኛ፣
ሌት-ተቀን የማይተኛ፣
እስከሚሆን በሽተኛ፣
ወይም ደግሞ ደመኛ።

በቂም ልቡ የተወጋ፣
አይተኛም በበቀል ፍለጋ፣
ሌሊት አልፎ ቀን እስኪነጋ፤
እየተመታ በንዴት አለንጋ፣
አይነሳምም ከኃጢአቱ አልጋ፣
ይሞታልም ካምላክ ሳያገኝ ዋጋ፣
ምንም ስላልኖረ በእግዜር ጸጋ።


ሰው ከሰው ካልታረቀ

ሰው ከሰው ካልታረቀ፣
ይቈጠራል ከፈጣሪው እንደራቀ፣
ምንም ቢመስለውም በዕውቀቱ የተራቀቀ፣
ፍቅር በሙሉ ከልቡ እየተፋቀ፣
መንፈሱ በንዴትና ቍጣ እየደቀቀ፣
ደሙም እየፈላ ልቡም እየሞቀ፣
ይኖራል በጥላቻ እንደ ተዘፈቀ፤
ሳይነሳ ይቀራል በኃጢአት እንደወደቀ፣
እንዲሁ ይሞታል በንስሐ ካልጸደቀ፣
ሕይወቱ ጠፍቶ በሰይጣን እንደ ተሰረቀ።

%d bloggers like this: