IRROB.ORG

Home » የአባ ተስፋማርያም አስታየቶች » ለሁለት ጌቶች መገዛት

ለሁለት ጌቶች መገዛት

ለሁለት ጌቶች መገዛት ስለማይቻል

ክርስቶስ በወንጌል እንዳስተማረው፣
ለሁለት ጌቶች መገዛት አስቸጋሪ ነው፤
ለምን ይሆን እንዲህ ያለው?
ስለምን ሁለቱ ተቃራኒዎች ናቸው፤
አንዱ የእውነት ሲሆን ሌላው የሐሰት ነው፣
አንዱ የፍቅር ሲሆን ሌላው የጥላቻ ነው፣
አንዱ ዘላለማዊ ሲሆን ሌላው ጊዜያዊ ነው፣
አንዱ ሰማያዊ ሲሆን ሌላው ምድራዊ ነው፣
አንዱ ደግ ሲሆን ሌላው ክፉ ነው፣
አንዱ ቅዱስ ሲሆን ሌላው እርኩስ ነው፣
አንዱ አዳኝ  ሲሆን ሌላው አጥፊ ነው፣
አንዱ ፈጣሪ ሲሆን ሌላው ፍጡር ነው፣
አንዱ ብርሃን ሲሆን ሌላው ጨለማ ነው።
ስለዚህ ወንጌል እንደሚለው፣
አንዱ ሲወደድ ሌላው የሚጠላው፣
ሌላው ሲጠላ አንዱ የሚወደደው፣
ሁለቱ ተቃራኒዎች በመሆናቸው፤
የሰው ልጅም ምርጫ ስላለው፣
ከሁለቱ ላንዱ ነው የሚያደላው፤
ለእግዚአብሔር ወይም ለሰይጣን ነው፣
ልቡን ሰጥቶ የሚገዛው ላንዱ ነው፤
በመልካም ወይም በክፉ ሥራው፣
በአምላክና በሰው ዘንድም የሚታወቀው፤
ሁላችንም እንደምንገምተው፣
አብዛኛው ሰው የሚያምነው፣
እግዚአብሔር የፍቅር ጌታ መሆኑን ነው፤
ሰይጣን ግን የጥላቻና የክፋት መንፈስ ነው።

ስለዚህ ጥያቄው፣
ሰው የሚመርጠው፣
ዬተኛውን ጌታ ነው?
ሁላችን እንደምናውቀው፣
ሁለቱን ማምለክ ግን አስቸጋሪ ነው።
ለኔ እንደሚመስለኝ ለሰው ልጅ የሚሻለው፣
ለእግዚአብሔር ጌታ መገዛት ነው፤
ከዲያብሎስ ግን መሸሽ ነው፤
ስለምን ሰይጣንን ለተከተለው፣
የሚደርሰው ዕጣው፣
ዘላለማዊ የኵነኔ ፍርድ ነው።
ሆኖም እምነት ለጐደለው፣
ይህ ሓቅ ስለማይገባው፣
ውሸትም እየመሰለው፣
ቅዱሱን መንፈስ በመተው፣
ለእኩይ መንፈስ ነው የሚገዛው፣
በሕይወቱም ላይ የሚያመጣው፣
ዘላለማዊ ጥፋትን ነው።
እምነት አለኝ የሚልም ሰው፣
በሃይማኖቱም የሚመካው፣
ከሁሉም የጸደቀ እየመሰለው፣
ግብዝ ሆኖ ነው የሚገኘው፤
አምላክ የሚያየው፣
አፍአዊን ነገር አይምሰለው፤
እርሱ የሚፈልገው፣
ውስጣዊ እውነታንና ሁኔታን ነው።
በአፍ ብቻ አምናለሁ የሚለው፣
ሥራው ግን ተቀራኒ ሆኖ የሚገኘው፣
በአምላክ ፊት የሚፈረደው፣
በሕይወቱ ዘመን ባፈራው፣
ጸጋና ጽድቅ በተሞላው፣
መልካም ፍሬ ብቻ ነው።
አለበለዚያ መንፈሳዊም ተብየው፣
ከክፋትና ጥላቻ ያልተቈጠበው፣
በመጨረሻ በርሱም ላይ የሚደርሰው፣
ከአምላክ ዘንድ የሚሰጠው፣
የዘላለም የፍርዱ ውሳኔው፣
ከማያምኑቱ በድንቍርናቸው፣
የተለየ አይምሰለው።
ይህ ለምን ይሆናል ብሎ ለሚጠይቀው፣
አምላክ የሁሉን ልብ ስለሚያነበው፣
ምንም ሥራና ተግባር ስለማይሰወረው፣
አይታለልም በማንም ሰው፤
ኃጢአተኛም ሆነ ጻድቅ ነኝም ተብየው፣
እርሱ ሰውን ሁሉ የሚፈርደው፣
ልክ እንደየ ሥራቸውና ጽድቃቸው!
ስለዚህ ለሁለት ጌቶች ለሚገዛው፣
በዘላለሙ ኵነኔም ሳይቀጣው፣
ለእውነተኛው ፈጣሪ ብቻ ተገዛ እንበለው፣
ስለምን ለኛም ጽድቅ ነው የሚሆነው።

 

%d bloggers like this: